Paul di bura Philemon rofu

Ago di ini adina

Philemon bi ekalesia amiye gira tora yokoi, Colossae taoni di dubu gutu amiye yokoi baeko ma ina bi moimai rei tavoi rena amiye yokoi ini roka Onesimus di ini warika amiye. Mina moimai rei tavoi redo amiye bi ini warika amiye rofu ori diyo resi Paul diburari amedo mina baku reyo. Paul dada Onesimus bi ekalesia amiye niyo.Paul di bura Philemon rofu di bi usausa Philemon ini moimai rei tavoi redo amiye rofu uka yokoimaka nisi ina rofu dairiyainedi. Paul yaku Onesimus Philemon rofu moi feideyo ma, ada dudu moi dairiyaine ini moimai rei tavoi redo amiye kana de, idu ekalesia amiye ini dubuini kana niyaine.

Beika sina ideriAgo di ini adina1–3Philemon di uka mana ma uka vari gira mana4–7Philemon yaku Onesimus dairi moigi usausa niyo8–22Metona ago23–25

Philemon

1 Mina bura bi na Paul, Keriso Iesu dada, dibura yavari ameida ma uni dubuini Timothy vakoi —

Uni mokei vava resi vakoi moimai resifa amiye Philemon ya rofu, 2 uni tobaini Apphia, ma Archippus rofu kaere bi Sei di una sa iya redo amiye, ma ekalesia vene kaere bi yi yavari egogo rededi: ^a

3 Sei uni Baba ma Warika Amiye Iesu Keriso di ini buni toragade ma uka amuta bi ya vene fafau.

Philemon di uka mana ma uka vari gira mana

4 Ari neinei nai usausari ya rofu mokeida nai Sei rofu buni toragade vo nida, 5 adina bi yi sina neideyaka bi, ya yaku Sei ini vene rofu uka maisa, ma ya yaku Warika Amiye Iesu rofu uka vari gira masi ameisa. 6 Nai usausa ya rofu bi yi uka vari gira rau reisa bi rebiyainedi, ye beika buni tau Keriso rofu moiyafa mina bi diba kotana niyainedi. 7 Nai dubuini, Sei di vene tau noibanu rofu yi uka maisa dada, ini mokena moi gira reisa. Makai dada na bi ada reida ma nai uka ka buni amedo!

Onesimus moigika usa niyo

8 Mina resi na bi Keriso di ini rokari uka bubu ma ago gira dudu beika reyainedi ya nigida 9 idu, uka mana fafau ya usa nigida. Na kaere Paul, ugava niyaka ma gua ka Keriso Iesu di dibura amiye. 10 Nai usa bi yomini: Onesimus rofu di, kaere bi dibura ideri amegamaka ri nai mida kana niyo. ^b 11 Sena ina bi no iniyeiniye ya rofu, idu gua bi ya rofu ma na rofu ka buni iniye ^{▼▼v.11Mina roka Onesimus Greek agori bi “buni iniye.”} niyo.

12 Ya rofu dairi ni feideida mini, ina kaere bi nai uka meko. 13 Nai ura bi ina na sa ameibiyaine, ye ya kana bi ina yaku yi sanari na aedego ago buni dada dibura ideri ameida kana. 14 Idu ya ya diba nina koderi bi na ura de, ye yi vegu buni beika ura regiya bi yi mokena dudu regiya ma nai mokemoke dudu bi ide.

15 Mina nei itua ya fereyo di adina bi ya yaku dairisi kamini toga ya sa ameibiyainedi baeko, 16 ma moimai rei tavoi redo amiye de, idu mirona amei baigamo kana de; gua bi mokei vava rena dubuini kana. Ina bi nai mokei vava reida, idu ya rofu bi mokei vava tora iniye regiya, vakoi amiye kana ma Warika Amiye ideri dubuini kana.

17 Ye, ya yaku mokegiya na yi asini vo nisi bi na moi dui regiya kana ina ka makai re. 18 Ye, ina yaku ya rofu beika no be reyo o beika moiyo mina de ya moi dairiyo bi nai rokari ae. 19 Na Paul, na kaya nai vana dudu bura reida.Beika moiyo bi dubusa ya moi dairigida. Ma ya kaya yi vegu mina bi nai de ni okugida. 20 Nai dubuini, nai ura na bi ya rofu Warika Amiye ideri ini obini be moigida. Nai uka moi ada regiya Keriso ideri!

21 Ya rofu bura reida bi ya mokei vava reida yi neideneideri. Na na diba beika ya usa nida bi ya yaku besabesa regiya dada. 22 Ma sina yokoi ka yomini: Nai daiyutu yokoi moi dogo regiya. Adina nai uka aeida bi Sei yaku yi usausa neidesi na moi dairigo ya rofu.

Metona ago

23 Nai asini Epaphras, kaere bi Iesu Keriso dada na sa dibura yava ideri amedo, yaku ini yuata ni feidedo ya vene rofu. ^d 24 Nai moimai resifa vene, Mark, Aristarchus, Demas ma Luke yaku ka ini yuata ni feidededi. ^e

25 Warika Amiye Iesu Keriso di ini buni toragade bi ya vene di vima sa ameibiyaine.